الأحد، ٢٧ سبتمبر ٢٠٠٩

201


مساكم الله طيب...

بمناسبة البوست رقم 201 و بمناسبة اول يوم دوام بعد رمضان و إجازة العيد... أكتب هالبوست و انا كلي مشاعر مختلطة ما بين أسى و غضب و حزن.

نقلا عن جريدة الآن، أضرب اليوم عمال النظافة في وزارة الشؤون الإجتماعية و العمل لعدم تسلمهم رواتبهم، و التي تدفعها الوزارة للشركة المتعاقدة معها بعقود دورية، و لا اعلم إن كانت العقود سنوية أم شهرية. و قد قام الوزير العفاسي بتكليف فريق بتسلم 1,200,000 دينار من الشركة المتعاقدة مع وزارته لتسليم العمال أجورهم.

تبون تعرفون منو ورا هالموضوع؟





و تدرون منو رئيس مجلس إدارتها؟


الحدسي، النائب السابق، و الناظر السابق جمال الكندري

أخبرنا أبو طاهر الفقيه أنبأ أبو حامد بن بلال البزاز ثنا الزعفراني يعني الحسن بن محمد بن الصباح ثنا إبراهيم بن مهدي ثنا عبد الله بن جعفر أخبرني سهيل بن أبي صالح عن أبيه عن أبي هريرة قال : : ( قال النبي صلى الله عليه وسلم : أعط الأجير أجره قبل أن يجف عرقه .).

هناك ١٠ تعليقات:

enter-q8 يقول...

سرحان ترى حتى الابراج يوم خذاها من اليعقوب معاطاه فلوسه بنفس الوقت قعد يماطله لدرجة ان قعد يصلي وراه يبي يصيده

well_serviceman يقول...

اول شي انباركلك البوست 201 وعقبال أل four digit number

بالنسبه حق العمالة ، هذي مو جنه ثاني شركه ما تعطيهم رواتب؟ شسالفة ربعنا مع رواتب العماله؟ هذا واهو محسوب علينا "إسلامي"..

جبريت يقول...

مليت وانا اعلق على هالحبيب

لذا سأترك التعليق لغيري

اهم شي قلبت عربي فصيح

YusuF.AsKR يقول...

أووووووه

سرحان .. بإعتباري موظف قطاع خاص مخضرم (:
و
من خلال بعض المصالح التجاريه اللي كانت تربط شركتي مع شركة الابراج !

فـا .. بقولك عن بعض سوالف الابراج !

طبعا هالمعلومات حصريه لسرحان (:

- صحيح ,, جمال الكندري رئيس مجلس الادراه و عضو منتدب و عنده أكثر من تسع آلاف عامل وهمي بإسم الشركه مو قادرين يحولون إقاماتهم لشركه ثانيه إلا بمبلغ وقدره 200 دينار

- عنده مناقصة نظافه مع وزارة الشؤون و مع شركة النفط k.o.c و بكل المناقصتين قاعد يستخدم عمال من الشارع و يشغلهم على أبوو انهم تابعين له !

- عنده تسع آلاف عامل ما يقدر يشغلهم بمناقصاته مع الوزاره لانه ماخذ عليهم فلوس الاقامات و مهيتهم بالشوارع !
و
بنفس الوقت قاعد يلملم عمال من الشوارع ويعطيهم معاشات متدنيه وعليه إنذار أخير من الوزاره بسبب الغيابات والشكاوي المتكرره للعمال !

و غيره سوالف كثيره سمعتها عن شركة الابراج و عن أصحابها الكندري ومعاه شخص معروف نسيت أسمه و الثالث شخص مصري إهو اللي مضبط لهم الشغل عال العال

- ليييش إنروح بعيد ,, الهندي اللي يصب شاي و قهوه عندنا بالشركه إقامته على شركة الابراج و رافضين يحولون له الاقامه ليمن يدفع 200 دينار و شركتنا تقوله حول إقامتك علينا بأسرع وقت و إلا إنجيب واحد مكانك ! و المسكين الهندي إبتلش !

الدســتور يقول...

الحين بيقولون لك
هذا تصرف فردي وماله شغل فينا
مثل ماطلعوا البصيري

الحوري يقول...

نفس الشركه اللي ماسكه عقود النظافه بوزارة المواصلات ...
وصارلهم اكثر من 6 اشهر مو معطين رواتب حق عمال النظافه ،،،
الله وكيلك قاعدين انسوي قطيه من الموظفين علشان انساعد هالعمال الفقاره ...
عرفتوا الحين ليش يستذبحون علشان يصيرون اعضاء ...
هذي وحده من المناقصات ،،، والترضيات ...
وشوفوا عاد علشان تمرير اي مشروع خذا هالعقود من وزاراة الدوله
هكذا تدار دولة الكويت ...
مع الاسف

هالحـــــزة يقول...

والله يربحون الحدسيين ..

غير معرف يقول...

جمال الكندري مديون لدى بيت التمويل وعليه كلما تدفع اي وزارة أجور العاملين يتم سحب المبالغ لسداد المديونية , وبحسب كلام أحد العالين فانهم حتى الان مر عليهم 8 اشهر لم يستلموا معاشاتهم .

غير معرف يقول...

هذي الشركه نفسها اللي تاعطي عمال نضافه حق التعليم العالي؟ لانه واحد من العمال اللي شفته هناك كان قاعد يتشكالي عن واحد ولد الكندري يقولي ماخذو معاشاتهم صارلهم جم شهر. هذا الحجي قبل ارمضان.

سرحان يقول...

خلوها على الله...

لا هو أول واحد... ولا آخر واحد

ولا الوسيلة براااءة ها؟؟