شتسوى عليكم؟؟

شتسوى عليكم يالوطن؟

هذا كان رد ناس من المغرب... بسبب حلقة من بو ملاقة و بو مليق، لكن هل سيجرؤ أحد أن يحاسب قناة الوطن؟

سؤال يا جماعة سؤال

و الله سؤال محيرني... هالسؤال طلع معاي من بعد البوست السابق

ليش الأخوان المسلمين بالكويت ينكرون إنهم أخوان؟ إذا جمعية الإصلاح مو أخوان... و الحركة الدستورية مو أخوان... و الائتلافية بالجامعة مو أخوان...

منو الأخوان اللي بالكويت؟؟؟؟

و ليش يستعرّون من إنتماءاتهم؟!؟!

أبي الأخوان اللي يطلعون فجأة بالمدونات يردون... و اللي كلهم "غير معرّف"

يالله ردوا و اللي يجاوب صح بهديه نكتة :)

الصرح الأعلى

مساكم الله بالخير و النور و السرور...

مبارك عليكم الشهر و سامحونا على الانقطاع الغير مقصود بسبب ظروف صعبة متعددة و من أهمها قلة النوم و ضيقة الخلق، و يا سبحان الله، بهالشهر الفضيل الواحد صدره ينشرح و نفسه تنفتح على كل شي... بالنسبة لي استانس لما أشوف الفساد و المفسدين يلعبون و يسرحون و يمرحون ولا أحد يدري عنهم- أو بالأصح يدرون عنهم بس "يستهبلون" و تييك مدونة تشتغل عليهم.. الفساد اللي شادني هاليومين هو فساد أعلى صرح أكاديمي في البلاد... جامعة الكويت

هالمرّة الموضوع مو بس شغل طلبة... لا لا لا.. شغل على مستوى :) على مستوى مدير... و أمين عام... و مناصب إدارية... و سيستم.. و مشتريات بدون مناقصات... و نقل و تعيين الربع :)

الموضوع كالتالي... عندنا طرفين اساسيين، مدير الجامعة د. عبدالله الفهيد، و أمين عام الجامعة د. أنور اليتامى...  وعشان نكون واضحين د. الفهيد لاهو قاعد يحل ولا يربط و هو بالضبط فريسة للتصفيات السياسية، الرجل واقع بالنص ما بين صراعات وزارة  التربية مع تيار الأخوان اللي يبي يفرض ربعه و يثبت أقدامهم في كل مؤسسات الدولة الحساسة، و منها طبعا الجامعة.

و عندنا بالطرف الثاني الأمين العام الحدسي د. اليتامى اللي مشتغل توظيفات من دون الرجوع إلى معايير الكفاءة، و يوظف منو؟ الحبايب القراب - نظام "لي حبتك عيني..."... طيب... السؤال البديهي اللي يطرح نفسه ليش هالتوظيفات؟ ليش هالنقل و التعيين و التحويل؟

أنا بقولكم سالفة "سمعتها" و ماراح أؤكدها عشان ما أحط بذمتي... سيستم التسجيل الزفت الي بالجامعة و اللي كلنا عانينا منه - أغلبنا يمكن إذا أكو ناس خريجة أمريكا- هو من نوع Oracle و هو نوع معروف من برامج إدارة قواعد البيانات. الحاصل الحين إنه تم تجديد السستم، و اللي يفهمون بالكمبيوتر يعرفون إن أي تحديث يشمل جزئين، برمجيات و نظام تشغيل، و الجزء الثاني سيرفرات (أجهزة كمبيوتر) ذات طاقة استيعابية عالية...

أخوكم سرحان نبّش بالموضوع... و لقى إن المناقصة رست على شركة النواصي (الغانم) لتوريد الأجهزة المطلوبة... و هني الشغل مظبوط و قانوني 100% عال العال (مناقصة 3/2009/2010)، لكن السؤال!! وين مناقصة البرمجيات المطلوبة و اللي تكلف وايد!! يقال و العهدة على الراوي أن صاحبنا هو أحد موزعي "Oracle" في الكويت و بأن توريد النظام تم عن طريق شركته اللي مسجلها بإسم أحد اقرباءه من الدرجة الأولى... أحيييييييه يا بو سوسو أحيييه!

طيب... وين الربط بالموضوع؟؟ أظن و الله اعلم بأن الربط هو في إنك تظبط أصحاب القرار اللي تحتك و تفر و تعدل و تبدل مواقعهم نفس الشطرنج، و بعدين "تهجم" و تقول كش ملك حق الفهيد و تصير الفايدة إدارية و مالية. نقابة العاملين بالجامعة كان لها تصاريح عديدة حول تنفيذ الأمين العام لـ 80% كإنجازات من المخطط (ياخي الأخوان بكل مكان نفس السيناريو و الاسطوانة!!)... تفاصيل تصريح هيثم الهاجري رئيس النقابة موجودة هني... إقروها و عيّدوا

إيييي نسيت أقولكم... إن كتاكيت الأخوان (الإئتلافية... اللي ماسكين اتحاد الطلبة) كان لهم نصيب من الكيكة، و هو إلحاق "الانجاز المبيوق" بإسمهم و إنهم أصحاب الفضل في تجديد السستم... فأبشروا يالطلبة بحملة "التمنن" اللي بتحوشكم الكورس القادم... علما بأن السستم الجديد هو "نظام التسجيل للطلبة + نظام إداري و مالي لموظفي الجامعة". و على فكرة... كان في قرار بفصل رئيس الاتحاد الأخونجي - و تم حفظه على الرغم من أن القرار كان موجود و بانتظار التوقيع فقط... منو اللي "أمرهم" يوقفون التوقيع؟؟ الله أعلم!

للأمانة و تحاشيا للظلم... أؤكد بأنني أنقل فقط الكلام الداير و اللي سمعته من أكثر من طرف مالهم علاقة ببعض، أتمنى من اللي عنده تصحيح لكلامي أو دليل يؤكده فلا يبخل علينا فيه... و مشكورين.