السبت، ٩ مايو ٢٠٠٩

فضيحة من العيار الثقيل !!!!

السؤال الذي تردد لذهني كثيرا.. كم زائر سيدخل للمدونة بعد قراءة العنوان المثير الذي يبدأ بكلمة "فضيحة"؟ هذا يرجع لعدة عوامل... بلاغة الشف المتوفرة بغزارة لدى شعبنا الحبيب، و حب "الفضائح" بلا شك هو الـ HIT رقم واحد عند حبايبنا!

اللي لاحظته... و خصوصا فيما يتعلق بموضوع يوتيوب د. أسيل، و أنا راح أقيس الموضوع على مجموعة من الأفراد اللي قعدت معاهم و تناقشنا بهالموضوع... بس قبل لا أكمل كلامي لازم أوضح إنه شخصين منهم (من إجمالي 3) مستحيل يصوتون لإمرأة (مخهم جذي... شسوي!)... اللي لاحظته عدّة نقاط:

  1. الكل صار مفتي زمانه و يتكلم في اللي يجوز و ما يجوز.
  2. الكل صار فاهم باللي كانت الدكتورة اسيل تفكر فيه لأنه دش بأخلاقها و فهم أفكارها و صار يحق له إنه يفسر على كيفه.
  3. الكل (للأسف إنجر) ورا هالموضوع... و شلون لأ و هالموضوع عبارة عن فضيحة!؟ لا ما يصير نطوفه... تعرفون شلون حوادث الدائري الرابع؟ جذي بالضبط.. الكل يدري إنه حادث بس الكل يوقف و يطل و يقعد يحلل هالحادث على كيفه طول الطريج لين أهو يسوي حادث بعد!
  4. محد... و أنا متأكد إنه محّد "فكر منو ورا نشر هالتسجيل".
  5. محد... و هم متأكد إنه محّد "فكّر ليش التسجيل مقطّع"... مع إنه التقطيع واضح... لا مو مهم... المهم نصفي حساباتنا و نطق خصومنا و "الناس راح تصدق".
هذي دقمة الشرف... يالله رعصوها و كل واحد على مقرّه





بس اللي أنا مستغرب منه...
  • شلون محد يدري عن (ط.م) اللي قاعد يشتري أصوات لجمال العمر؟
  • و شلون محد يدري عن سر تراجع المسلم عن موضوع الشيكات و الترشيح؟
  • و شلون محد يدري عن النائب السابق إللي "إنطرم" بالمجلس إللي طاف لأنه "إستلم" المقسوم و سجله بإسم زوج إخته؟
  • و شلون محد يدري إن وليد الطبطبائي قال عن الليبراليين إنهم يذكرونه بقوم لوط؟
  • و شلون محد يدري عن التفكك الحاصل داخل حدس في الدائرة الثالثة؟
  • و شلون محد يدري عن أعضاء حملة "مرشح ترشيد" اللي يديرون جريدة الكترونية مهمتها الهجوم على المرشحين المنافسين و تشويه سمعتهم؟
  • و غيرهم وايد!
كل هذا محد يعرفه... لكن الكل قام يفتي بموضوع أسيل... خاصة اللي (من الأساس يرفضون التصويت لإمرأة).. و يا سبحان الله! لما صارت هالسالفه كلهم قاموا يقولون "و الله كنا بنعطيها لكن عقب اللي سمعناه ماراح نعطيها"!

أنا لي راي و أتمنى الكل يحترمه! أنا كنت بصوّت لأسيل العوضي... و مازالت راح أصوت لها بإذن الله طول ما إهي ترشح نفسها... لإقتناعي فيها و ماراح "اكون سطحي" و محب للإشاعات و الفضايح "اللي فيها تبلّي على الناس"! نعم أدعمها و سأدعمها... أكثر من أول! بتقولونلي إهي قالت "هذولا" عن زوجات النبي عليه الصلاة و السلام؟ إنزين و بعدين؟... قالت هذولا... هل شتمتهم؟ هل استهزات فيهم؟ ولا الكل صار حنبلي؟ أنا لما أقول هذول أهلي.. قاعد اسبهم ولا أقلل من مقدارهم؟ يخرب بيت العقول الداثرة! على فكرة... للحبايب أصحاب التسجيل، اللي قطعوا فيه و نشروه... هديتي لكم بالطريج :)

هناك ٤٧ تعليقًا:

nEo يقول...

طرحهم راح يرد في نحرهم

ExBlogger يقول...

كل إناء بما فيه ينضح ، وهذا اناءهم وهذا اللي فيه.. :)

ننتظر هديتك لهم..

دلال يقول...

اللهم رد كيدهم لنحرهم
دكتورة ضحية لحرب قذرة من قبل التيار الاسلامي الي فقد ابسط طرق المنافسه الشريفه ولا ترمى الا الشجرة المثمره حاولوا ضربها عن طريق اشاعه مقرضه يتوصلون من خلالها لعقليه اغلبية الشعب الكويتي ..!!
لكن انا متأكده ان الدائرة الثالثه ماصدقت ولا راح تصدق الفيديو الملفق لان يعرفون طرحها و اسلوبها الراقي في الحوار !
مثل ماقلت الي يقول بعد ماسمعنا الفيديو ماراح نصوت هذا لم و لن يؤمن يحقوق المرأة !

القافله تسير و عدس تنبح !

مشكور على البوست الرائع جداً

enter-q8 يقول...

استغرب منك يا سرحان
كأن هالكلام التافه مالهم اهو اللي راح يغيير قناعة الناس اللي عندها عقل
انا واحد مثلا ما ابي اصوت لأسيل هل بسبب تسجيل حدس الاعرج لأ انما قناعات و تختلف من شخص لاخر
لا تعطيهم اكبر من حجمهم و كأنهم غيروا قناعات بالعكس انا اعرف ناس ما كانت راح تصوت لأسيل بس عناد بحدس بتصوت لها

غير معرف يقول...

ماقول إلا الله يوفقج يا دكتورة أسيل

Icarus يقول...

ناطرين الهدية :)

Mohammad Al-Yousifi يقول...

اذا هديتك مو فضيحة ما نبيها


يا تفضح يا تسكت

غير معرف يقول...

اتمنى ما تكون هديتك فضيحة ..
انا ادعم د.اسيل ..
واحد من الاسباب انها ما تتبع الاساليب "الوصخة" الدارجة حاليا بالانتخابات ..
هدوؤها .. رقي اسلوبها .. تفكيرها بالكلمة قبل لاتقولها .. و اهم شيئ موضوعيتها بالكلام .. ماتهجم شخص احد ..

الواحد ماينزل من نفسة عشان يثبت ان خصمة غلط ..
الصح صح .. اكون واثق و مايغير شيئ من مبادءة .. و انا هذا الي شايفتة منها و اتمنى اشوفة من الي يدعمونها.

عسى الله اوفق الكل .. و انشاء الله اسيل بالمجلس هالسنة يا رب :)

أنا كويتي يقول...

و محد سأل شلون مرشح يقول أنا ضد حقوق المرأه, ومع هذا يعطونه أصوات؟

كما تكونوا يول عليكم

كنت من أنصار أسيل, لكن الآن أقول لها:
نارك ولا جنة هلي

Yang يقول...

افا؟!؟!؟!؟؟!؟

"فضيحة من العيار الثقيل !!!!"


وانا ركضة ركضة حتى ما مداني البس الدشداشة ويايك بالمكسر, وآخرتها ما كو شي :((((


انا ناطر الفضيحة الياية :)


تحياتي

الدســتور يقول...

ياحبك للعناد

:)

صوت لها تستاهل الدكتورة

Ahmad يقول...

عين الحكمة
مقال رائع
شكرا
و سنظل مقتنعين بالدكتورة أسيل صاحبة الطرح الراقي الوطني

غير معرف يقول...

thabel walla,




oana ar3as el dogmah ,wa5ezyah ,sej q8yteen,mako faydah ,bas la t5af 3al asel,asel 3sal o ra tfouzzzz,,

غير معرف يقول...

انا طرف محايد بس حبيت اعطي رايي باللي انت كاتبه و الله العظيم انت اكثر واحد ما اقنعتني بالكلام اللي انت قاعد تقوله !!!! كلامك مع الاسف مو مقنع اسفه بس حبيت اكون صريحه و اقول رايي

سرحان يقول...

انا بعتذر من الاخوة و الاخوات اللي علقوا بس ابي رد على الاخت اللي مو مقتنعه

رايج و اقتناعج يا اختي شي راجع لج و هذي نقطة ما عليها خلاف
اما بالنسبة لكلامي فهو الواقع اللي انا شفته، و ما غصبت احد

اللي بيقتنع كيفه واللي ماراح يقتنع هم كيفه!
تحياتي

Q8EL5AIR يقول...

اي والله كسرت فينه :)


بس حركة حولة .. وصوت حق الي مقتنع فيه وملك شغل بكلام الناس ماراح يخلص ..

وانا معاك ..



وتحياتي ..
ويسلمواااااااااااااااااا :)

جبريت يقول...

والله اللبراليين قوم لوط هذي انا انصح وليد الطبطبائي يشوف مساجد الدائره الخامسه الي امام مسيد تلقاه يجمع اليهال الصغار ويقول حق الحلوين منهم (حلو بالجمال وليس بالاخلاق)قصه لا اخلاقيه وهذا الكلام يعبر عن ما رأيته امام عيني في ايام الي كنت متدين ومتزمت وانا الي انلزم فيه وابرئك يا اخوي سرحان من كلامي

غير معرف يقول...

سرحان


كما تدين تدان


الصورة اللى نشروها السنة اللى فاتت عن رولا دشتى مع نصر الله

محد نشرها الا اسيل العوضى وربعها


وكلامك ما اقنعنى على فكره , وبعدين من قالك راح نصوت لجمال العمر ولا حق حدس او حق وليد طبطبائى حتى لو ساوو النون وما يعلمون

ما تقدر تغير قناعات ناس بيوم وليلة

الناس الوطنيين تعرف تصوت حق منو ومقتنعين بمرشحينهم




اذا بتسألنى انتى وجماعتج بتعطون منو اقولك

1 السعدون
2صالح الملا

و بــــــــــــــس

عبدالله الكيفاني يقول...

اولا انا اكره الاخونجيه واعتقد ان الليبرال مصلحجيه بعضهم مو كلهم مع ذلك كلامك مو منطقي ومايقنع على قولت الاخت الي علقت واذا قلنا هالكلام حق مدون وله ناسه ومتابعينه فمعناته انه يكون اسلوبك وحجتك بالكلام مره ثانيه اقوى ومنطقيه مو على حسب عواطفك بس عشان توصل وجهة نظرك بالصوره المطلوبه انا قلت هالكلام ومو شرط تعلق على كلامي اقرا وانت مبتسم و سلامتك :)

سرحان يقول...

نيو

باذن الله

سرحان يقول...

ExBlogger

للحين ما شفتوا اللي فيه كله

سرحان يقول...

دلال

و الله ظلم، و الله عليهم

سرحان يقول...

Enter-Q8

الموضوع إذا كان قناعة مثل ما تفضلت هني محد يقدر يغيرها إلا صاحبها... لكن ضرب السمعة بهدف تغيير القناعات شي أقبح مما تتصور

سرحان يقول...

غير معرف

آمين

سرحان يقول...

Jako

قريبا

سرحان يقول...

ma6goog

نبيها فضيحة

سرحان يقول...

غير معرف

آمين

سرحان يقول...

أنا كويتي

و غيرهم وايد!

سرحان يقول...

Yang

المرة الياية أبلغك بالتفاصيل :d

سرحان يقول...

أبو الدستور

حبيبي إنت :)

سرحان يقول...

غير معرف

Enshalla!

سرحان يقول...

Ahmad

مقتنعين على طول إن شالله

سرحان يقول...

Q8El5air

تشكرات :)

سرحان يقول...

عنيف

كلام كبير هذا @@ !

سرحان يقول...

غير معرف...

أحب أسلوب "الوقيعة"... و يا سبحان الله مادري ليش تذكرت كلام "أسامة الشاهين" بمقابلة الراي أمس :) أسلوب الضرب من تحت الحزام إنتي عارفة منو أهله.. و انتي عارفة بعد منو اللي يقولون الحق لو على نفسهم :) حتى لو تأخر الوقت!

و دام إنج مع الوطنيين و ما تبين تعطين أسيل... ليش مو حاطة د. رولا بالحسبة؟ :)

سرحان يقول...

عبدالله الكيفاني:

1- كلامي بنيته على اساس مشاهدات مو عواطف.

2- انا ما طقيت احد على إيده و قلت له إقتنع غصب :)

3- أنا قريت كلامك و أنا أضحك.. مو بس أبتسم :)

4- شاكر لك مرورك الكريم :)

كويتيه محتره يقول...

د.أسيل العوضي بالامس انت من أسره متواضعه واليوم من اين لك هذا ؟؟؟
د.أسيل منذ أقل من عام كنت بالمركز ال11 واليوم بالستفتاءات انت بالمركز الاول؟؟؟
>د.أسيل ما الذي تغير في طرحك في أقل من سنه ؟؟؟
هل الحكومه تريد امرأه أو أكثر في مجلس 2009؟؟؟!!!!
الاجابه نعم
كنت الامل لكن الان ضاع الامل لا للمال السياسي كم كنت اطمح ان أرى امرأه وطنيه في المجلس لا حكوميه . اليوم العم السعدون رمز و غدا نصوت للخرافي الله يلعن السيلسه والله يلعن المال السياسي ومبروك د.أسيل العوضي الفوز بالمركز الاول في الدائره الثالثه ولكن لن تكوني المرأه الوحيده التي ستدخل المجلس !!!! د.سلوى الجسار د.معصومه المبارك مبروك وعاشت الحكومه

غير معرف يقول...

سرحان شنو هالكلام الكبير


شسالفة اسلوب الوقيعه والشاهين

شوى شوى علينا

يعنى والله ابتلشنا

يا تمدحون فلانه يا انتم وقيعه ومدرى منو الشاهين

نص كلامك ما فهمته , شنو اهله وشنو مدرى شنو


لا بدعت يا عزيزى , اشوا انك مو مدرس جان ضيعت عيالنا

عزيزى , ما نبى ندخل احد بالحسبه لا هذى ولا ذيج

اعتقد احنا احرار

سرقالي يقول...

أنا مالي شغل بالثالثه ... بس أبي أقول أن الطرح مو واضح ... و ليش محد سألها في ندوه انتخابيه عن الموضوع ... و بعدين دائماً الحرب الإعلامية في فترة الانتخابات قذره.

سرحان يقول...

كويتية محترة

بوصلتج أبد مو ضايعة! و مبروك البروفايل الجديد :d

سرحان يقول...

غير معرف

المقصود بهالكلام يفهم معناه :)

سرحان يقول...

سرقالي

بالعكس سألوها :)

غير معرف يقول...

wooooooooooooow!!!!!!!!!! 9ij qawi il post! o atmana min kil ily yigra hal post o yiqtini3 bil kalam ily maktob feeh lina kil kilma inkatbat kanat man6iqiya, ina yansher el link o yekhalee akthar qadar men el nas t3aref 7aqeqat elnas ily e7awloon eshawhoon 9orat murasha7atna el mo7tarama wilqadera wily kilina niftikhir feha dr. aseel il3awathi o shlon ihya mathlona o shlon ga3deen yi7awloon yit9ayedon 3alayha el zala o 7ata lw magalat shay yi7awloon yi7orfon ib kalamha!

هل كيف يقول...

وعلى طاري التفكك اللي صاير بحدس
يقولون الشايجي مشفط على الدلال وجماعته توصي عليه بروحه

حلوة دقمة الشرف ضحكتني والله
تسلفني جم يوم؟ خل انجرب احساسهم
إذا دقيناها

غير معرف يقول...

رقي الطرح و الهادف هو ما نصبوا إلية
د. أسيل لقد ضمنتي صوت فواز (ناخب بالدائرة الثالثة) من الآن
بالتوفيق و شكرا لك يا سرحان

Q8Sky يقول...

مابعدها كلام


http://www.aseel09.com/e/index.php?option=com_content&view=article&id=46:2009-05-10-23-01-28&catid=2:2009-04-19-21-20-39&Itemid=9

جبريت يقول...

ترا فعلا يا سرحان انا كنت مطوع ومؤذن بأحد المساجد بمطقتي لفتره تتجاوز 5 شهور مؤذن وكنت اعرف الي موجودين ومن هم الي يسيطرون على الفكر داخل المسجد وما هم من داخلهم الا ناس تمارس اللواط داخل المساجد واجلك الله داخل حماماتها وازيدك من الشعر بيت بين مسجد ومسجد مسافه مو اكثر من 200 متر لكن يختلف الفكر من مسجد الى اخر منهم التكفريين ربع محمد هايف ومنهم الاخونجيه ومنهم التلف الطالح الي اهم المتدينين الحضر ومنهم اصحاب فكر غريب عجيب صراحه لا يوصف من كثر غرابته لكن الاكثريه يتواجد فيهم اللواط من ائمة او مؤذنين او غيرهم من المقربين ويمارسون اللواط مع ابناء لا تتعدى اعمارهم من الممكن 11 سنه بالكثير
والادهى والامر من هذا ماكو اي دليل قاطع قادر اصيده عليهم حتى امسح فيهم الارض