الثلاثاء، ٢٦ يناير ٢٠١٠

أعصاب + تحديث يحرق العصاب

تحديث يحرق الأعصاب
موضوع: دولة التأمينات المحتلة
من مدونة: انا أحتج

**********






الله بالخير يا جماعة الربع...


ما عليه طولنا عليكم اسبوعين، لكن الفترة اللي طافت من "أتبن" المراحل اللي مرت علي في حياتي كلها و الله يكافيكم شر البلا... الحمدلله على كل حال و الخيرة في ما اختاره الله.


طبعا أشياء وايد لها تأثيرات كثيرة و كبيرة، صحيا و نفسيا... و يا ويلي من نفسيا! المهم إنه هالأمور هذي كلها ترتب عليها ارتفاع في ضغط الدم و تصنيفي رسميا ضمن المصابين بهذه العلة، أضف إليها مرض جلدي ماني عارف شنو أسبابه، و اختمها "بالأرق المزمن"... أرد و أقول الحمدلله على كل حال.


طبعا رحت مستوصف المنطقة عشان أدخل على الطبيب و آخذ تحويل لمركز أسعد الحمد للجلدية. صفيت طابور، و حسيت نفسي غلط، لسبب بسيط و هو انني "يمكن" كنت الكويتي الوحيد الملتزم فيه بالإضافة جم وحدة فلبينية و جم هندي، اما أخواتي الكويتيات اللي كانوا برا الطابور من نوعية "ميني فان أزرق" اللي تكسر السير و تتكلم بالتلفون و تسوق و تقشر سبال بنفس الوقت و تسد الشارع عشان تاخذ عيال الفريج من المدرسة... ارتفع الضغط... واقفة تختم مرضيات بالجملة، و تقرب منها الثانية، تسولف مع الموظفة، و اللي واقفة تسولف تلفون و أبد أبد ما تحش بـ "منيرة" اللي حتى أدق تفاصيل حياتها عرفتها خلال 5 دقايق كنت فيهم واقف بالطابور...


دخلت عند الدكتور و عطاني التحويل، و رحت مركز الحمد اللي وصلت له بعد معارك مرورية شرسة ساهمت برفع الضغط زيادة و طبعا التحليق بأعصابي عاليا... و وصلت... و دخلت على الدكتور الثاني.. أول ما قرا ورقة التحويل طالعني و قال "إنت عصبي؟"... قلت إي.. و انفجر بو الشباب! تكلم عن المرور... تكلم عن نفسيات الناس... تكلم عن المعاملات... يا جماعة ترا فعلا العصبية صايرة مشكلة قومية!! 


ما أنكر إن كلام الدكتور خلاني احس بهمه و استصغر همومي.. المهم شكرته و أخذت الوصفة و رحت صيدلية المركز.. عبارة عن دريشتين بينهم و بين بعض أقل من شبر... و الله العظيم اقل من شبر...فرحت عند شباك صرف الوصفات، و "رمقتني" - حلوة الكلمة- الموظفة بنظرة فعلا تخرع.. قالتلي روح الشباك اللي يمي إخذ رقم!!! يا بنت الناس عسى ما شر ترا ماكو أحد و المركز بكبره فااااضي! قالت ما يصيييير لو سمحت هذي إجراءات! أوكي! قلت بالحرف إحنا ناس نحترم القانون و الإجراءات... رحت الشباك اللي يبعد شبر، و اخذت رقم من الموظفة الثانية اللي قاعدة يمها و تسولف معاها.. تخيلوا... عطوني رقم 85... و رحت لها.. كاهو الرقم... و احلى نظرة ثانية مرعبة... "إنت شفت رقمك طلع على البورد؟؟" قلت لا!! و ماكو أحد واقف أو حتى قاعد ينطر!!! ترد تقول مو شغلي!! صف دور ورا الحاجز!! صفيت! و الله العظيم تقريبا 3 دقايق... خلصت سالفتها... بعدييييييييييين طقت الرقم و صار 85 على البورد... ما تبون الناس تعصب و يحوشها ضغط و أمراض؟




أعصاااااااااااااااااااااب








هناك ٢٥ تعليقًا:

well_serviceman يقول...

ماتشوف شر يالغالي ، وعودا حميدا ، عيل شلون لي رحت عندكم معاملة بالمرور؟ شيصير فيك؟ أتوقع يحوشك زمهرير أخلاقي نفس ما حاشني الله لا يوريك!

تحياتي

غير معرف يقول...

ابتسم ... انت في الكويت

جبريت يقول...

بييييييه عيل انا مره رايح اصرف ادوية الضغط حق الوالده رديت البيت اناالي يبيلي حبوب ضغط فعادي هذي الكويت وصل على النبي

غير معرف يقول...

http://www.youtube.com/watch?v=9Xvn_Ku55cI

relax, take it easy

enter-q8 يقول...

علشان جذي اروح الخاص

bo bader يقول...

ما تشوف شر ، والضغط موجود عندي من خمس سنين .

أصلاً إذا ما فيك ضغط منت كويتي !!

سلامتك

غير معرف يقول...

موقف يخليك تحس نفسك يتيم بمبرة خيرية وهالموظف أو الموظفة كافلينك .. تستجدي عطفهم..
أنا أهنئك على صبرك بهالموقف ..

kal ho na ho يقول...

إي نعم ..صح!!

بس ليش الرقم 85 مو 63 وإلا 83 مثلا ..

اتهقون مواليدها ؟؟

ودمتم

panadool يقول...

لووووووووووول

على طارى المعارك اللى بالشارع

ما أعتقد يمر يوم بدون هالمعارك والزحمه صايره شيئ فظييييييييع

أشرب عصير ليمون

وشكرا

Sami يقول...

اجر وعافيه .. ما تشوف شر

سرحان يقول...

well_serviceman

الشر ما اييك حبيبي ما تقصر
طال عمرك أسوي معاملة بالمرور و أجدد جوازي و بطاقتي المدنية.. شرايك؟ :)

سرحان يقول...

غير معرف

ودي والله

سرحان يقول...

جبريت

ما تشوف شر الغالية.. و الله يكافيك شر الضغط

سرحان يقول...

Enter-Q8

بالحكومي أحرق اعصابي، و بالخاص أحرق قلبي على هالمعاش اللي نصه يطير أدوية

سرحان يقول...

bo bader

طبعا.. الضغط تريد مارك على جبهة كل "وتني" :) هههههه

سرحان يقول...

غير معرف

و الله ياخوك الصبر مفتاح الفرج... ناطرين الفرج

سرحان يقول...

kal ho na ho

لا هذا طول لسانها 85

سرحان يقول...

panadool

و الله ما يفيد بهالحالات إلا الزرنيخ

سرحان يقول...

Sami

الله يعافيك

الأستاذ مزيكا يقول...

السلام عليك
اجر وعافيه.
بسي يمكن تبي الرقم الموظفه وانت رافع الدريشه
عجبي والله انطر ماباجي شي الحكومه راح تبني مستشفي في البصره وانت رايح خذ وياك كرتون موز علشان تمشي امورك
عجبي والله

اقصوصه يقول...

loooooooooooooooooool

والله نقعت ضحك

انا بس اتخيل الموقف

يعني صراحه الواحد لو سايرلهم صاحي

وما فيه اي اعراض ضغط

بيطلع من عندهم ضغطه مرتفع اكيد:)

جبريت يقول...

http://q8np.blogspot.com/2010/02/alwatan-03-02-10.html#comments


هذا مو صاحبنا ما غيره ؟؟؟؟

الفلنتاين والي طاقينه الشرطه ومادري شنو قصته؟؟؟

ZooZ "3grbgr" يقول...

سرحانووووو

سلامتك يالغالي

عسى بكل حرامي بالبلد ولا فيك

الا شقالوا عن منيره؟؟

انا هذا كان البارت اللي ناطرته

:")

الجبهة الشعبية لمكافحة الجمبزة يقول...

نقدم لكم "جشكج" احدث افلامها


الفلم الرابع للجبهة الشعبية - الاعلام الوطني

http://www.youtube.com/watch?v=S4B8NggJVPU&feature=player_embedded




اصدارات اخرى


التجربة الأفريقية
http://www.youtube.com/watch?v=pn7MEqZeeF4



منوعات مجلس الأمة
http://www.youtube.com/watch?v=puLqMK_CfG8&feature=related



الجبهة الشعبية لمكافحة الجمبزة\ الدولة الخرافية 1\جشكج
http://www.youtube.com/watch?v=Tq7UJ9PzRX0&feature=related

مع تحيات "جشكج"

حَافِـيَةُ الَقَدمَيّـنْ ولِبَاسِي المَطـرْ يقول...

شيسوى عليك ياخوي
رحت بتعالج , اعتقد طلعلك مرض يديد وانت بالطريج :×
اشتر راحتك وروح الخاص
ولا عوار القلب ورفعان الضغط اللي
يسببونه بعض الموظفين لا بارج الله فيهم

ماتشوف شر إنشالله ,
كل الدوائر الحكوميه صايره ما اتحاجى
احس لازم تكلمهم نفس اليهال , بالمساحل :/ يالله يخلصون شغلك