الخميس، 18 سبتمبر، 2008

ليش ما نكبر شوية ؟

سلام...
في الأيام السابقة انقسم جمهور المدونين و متابعي المدونات إلى فريقين...
الأول: يتهم و بإستماتة لا مثيل لها جريدة الجريدة بمحاولة تشويه صورة الدكتور الخطيب و سرقة مسودة كتابه الجزء الثاني، بإقحام اسم مالك الجريدة النائب محد الصقر و رئيس تحريرها خالد هلال المطيري، و أيضا اقحام التحالف الوطني الديمقراطي بالموضوع بصورة بدت و لوهلة كأنها إحدى أدهى دسائس القرن للتربص بالدكتور الخطيب مستغلين - طبعا- ما قاله "الحثل" فؤاد الهاشم - عزكم الله- و غيره ضد الدكتور!
الثاني: يتكون من مدونات عُرفت بتأييدها للتحالف الوطني الديمقراطي أو توجهه، دافعت عن الجريدة باستحياء و أظهرت اعتزازها بالدكتور الخطيب و تاريخه مؤكدة بأن لا أحد يجرؤ أو يقدر ان يشوه صورة الخطيب، و مطالبة المدونات الأخرى بإظهار ادلة "سرقة الجريدة لهذه المذكرات و نشرها"... و بس!
يبه تدرون شلون؟
كلكم قاعدين تستغلون الموضوع لإحراج بعض! بعد هذي واضحة و جدام الكل أقولها و لحّد ينكر... و لسان حال "بعض الناس" يقول "يااااالله! حط حيلهم بينهم!"... أشوف الحين حلى بعيونكم الدكتور و التاريخ و صار الكل يدافع عنه و عن سيرة الدكتور و "كلكم" بدون اي استثناء - لا لا.. أكو استثناء... علي خاجة... كفو والله بو حسين- تناسيتوا "تنازلات" هذا الرجل العظيم في سبيل "الوحدة الوطنية" و "الإنصهار في قالب وطني واحد"... استغليتوا تاريخ رجل أفنى سنين شبابه و حياته لأجل أماني وطن! كفو عليكم.. كفو! رجال ما شاء الله! شلون الإحساس بالقوة و انتوا كل واحد فيكم من ورا الشاشة يقول "هاهاااي.. اتحداهم يردون على هالبوست"؟؟ وناسة ها؟
فؤادو السفلة و غيره شعللوها... و انتوا استغليتوها! سواء اللي فكروا بتصفية حساباتهم... أو اللي دافعوا باستحياء! أصلا و الله و الله عيب تحطون انفسكم بهالموقف! و عشان أكون واضح، ركزوا معاي بهالنقطة...
(جريدة الجريدة... خدّرت الدكتور و سرقت مسودات مذكراته و حرفتها من دون علمه)... إذا فرضنا صحة الجملة السابقة... ليش يبوقونه و "يحرفون التاريخ"؟ لزيادة المبيعات مثلا؟... و أهو وين عايش؟ مو بالكويت؟ و معقولة ما يدري إذا كانوا صج "بايقين المسودات"؟ رجل بمواقفه و صلابته ما يقدر "يطشرهم" إذا باقوه ؟ بالعقل ما يصييير كلامكم !!!
و الثانيين... بكل موضوع ماشالله عليكم مبدعين و لسانكم يلوط أذانكم! ليش طنيتوها بهالسالفة؟ هل ما تبون تدافعون عن الجريدة و التحالف؟ صراحة و مع احترامي للجميع انا أشوف الموضوع أكبر من تحالف و جريدة و صقر و هلال! الموضوع سمعة و اسم و تاريخ علم من أعلام الكويت!
جرّوكم لي ملعبهم وبلّشوا فيكم... حسبي الله! جنّه شغل مناظرة بالجامعة.. انتوا حرامية.. انتوا مزورين.. انتوابايقين.. عطونا دليل!
ليش ما نكبر شوية؟ كبروا رحم الله والديكم!!

هناك 13 تعليقًا:

nEo يقول...

و الله انك انت الفاهم


كلام منطقي عقلاني


لكت مشكلة اذا شفت ربعك و منك و فيك يقولون مثل هذا الكلام و انت مثل الاطرش بالزفة ضايع !!

سرحان يقول...

نيو...

حرّوني!!
اللي يحر أكثر إنه ناس ما يعرفون من السالفة ولا شي قاموا يفتون فيها.. أسأل الشخص من وين يايب هالحجي؟ يرد يقوللي من المدونة الفلانية!

غير معرف يقول...

تأكد أن في ناس قراب وايد من الدكتور رافضين اللى قاعد يصير وان اللى سوته الجريدة اهانة في حقه
ولكل حادث حديث حزتها راح تعرفون منو اللى كان فاهم ومنو اللى ضايع بالطوشة

حمودي يقول...

المشكله عندنا ان الكل فاهم والكل عنده دليل

سرحان يقول...

غير معرّف...

أنا ما أشوف إن الجريدة سوت شي غلط... مثل ما نشرت مسودة الجزء الأول قاعدة تنشر الجزء الثاني!

ولا قبلها التحالف و الجريدة و الصقر و المطيري ما كانوا "كُخّة" ؟

السؤال الأهم.. هل من هم حول الدكتور أعلم منه بما اتفق و وافق عليه؟ دام الرجل راضي هم شعليهم؟؟ أوصياء عليه؟

سرحان يقول...

حمودي...

اللي يقول عندي دليل مادري ليش يحسسني إنه بيقدمه للنيابة! يبه ناس تبي تسوي بلبلة و نجحوا و سووها!

و راح تسمع أكو دليل و أكو دليل.. طل! بتطخ السالفة، و بيدورون غيرها

نسينا سالفة الإنتخابات اللي طافت؟

ZooZ يقول...

من تعجل ندم .. وإن غذا لناظره قريب
واذا الدكتور ما تصرف حفاظا على وحدة الصف الوطنية تعتقدون بيوافق على اللي قاعد يصير

Bashar يقول...

سرحان

كلامك عين العقل :)

كفيت ووفيت ..

تحياتي

سرحان يقول...

لا اله الا الله....

زووز
الدكتور معروف بمواقفه و أفعاله و مو محتاج شهادة أحد


بشار
اعتز بشهادة أخ كبير

غير معرف يقول...

سرحان
اقرأ ما كتبته زميلتك شروق وأحسب أنك تعرفها، فهو قريب من خطك


فاروق

سرحان يقول...

كلامها جدا عقلاني و عالعين و الراس

شي معروف و متوقع من شروق

Safeed يقول...

تركوا القضية و تمسكوا بقشورها !
.
.
يا ليت خلافهم كان على " ما في المذكرات " من مصايب توضح سبب وصولنا لهالحالة الكسيفة بين جيراننا !
و لكنهم نسوا كل هذا و تهاشوا على (الجريدة ) .. و ( الخطيب ) !
و كأن الدكتور كتب هالكلمات و اهداها للشباب ... عشان يحطونها كنتاج للتحالف ، مو كشاهد على ما صار !
.
.
لست ليبراليا و متبرئ من القومية و لا احب العلمانية و لا اعتبر نفسي من ولاية الفقيه و غير مقرب من الاخوان و السلف ... واحد من العامة .. و لكن تهمني الكلمة الصادقة !

سرحان يقول...

safeed

رايك سليم و كلامك عداه العيب