الأحد، 2 نوفمبر، 2008

جت الحزينه تفرح...

من أولها يا VIVA؟ أمس استبشرت خير و قلت يالله هانت و بحصّل رقم قوي و حلو و مرتّب... طبعا بعد ما وصلني هالمسج من واحد من الشباب...




أمنّا بالله... دقينا على مركز خدمة العملاء الخاص بـ VIVA و سألت بكل بساطة... حبايبي متى أقدر أحجز رقمي؟ الرد كان طبعا أروع ما يكون... "أكيد بأسرع وقت عن طريق موقعنا".. حلو! ماشي! و أجابل موقعهم 4 ساعات بالدوام و شافط على الأمة بكبرها و بس طايحله REFRESH... ما اشتغل!

دقيت عليهم مرة ثانية.. و هالمرّة طوّلوا شوية على ما ردوا.. ما أحط بذمتي ليش.. بس يمكن ليش شركة يديدة و "حزّة غدا" فعذرهم معاهم... جان يردون علي... قلت "يبا موقعكم ما بطّل!" قاللي الموظف "لا ماراح يبطل اليوم"... يه!!!

ميخالف شركة يديدة و مضيعين الشباب ما ينلامون... زين يبا وين اقدر أحجزلي خط الحين؟ قاللي إذا تبي تحجزه الحين روح هالأماكن... و سطّرلي نفس الأماكن الموجودين بالمسج.. طيّب.. رحت المارينا... و أشوف هالجماعة الحليوين شزينهم و لا مو فرع... طلع كشك "عنّونو"... و الجماعة يوزعون "بروشورات"... حبيبي بحجز رقم... لا ماكو حجز اليوم...
و ألحين أنا بالبيت محتر! لا لقيت خط... ولا حتى حجزت! و تأخرت! و زلقت سيارتي بغيت أدعم! و ما تغديت!!! و حتى اسمهم ما ينكتب بالعربي.. خو إذا بكتبه بالعربي يصير "فيفا" ... و ربعنا بالكويت أبد مو حاقدين على فيفا بسبب تعليق النشاط الكروي الكويتي... فبسمّي هالشركة "اللي ما تتسماش"!!! الحين الكل مستنفر و يبي خطوط... و الكل استنفر و اكتتب في اللي ما تتسماش... و هذي آخرتها؟ شكو دازين مسج؟ تفلسف؟ TEASER يعني ويّا الويه؟؟؟


ترا صج احتريت! و صدق من قال...


"جت الحزينة تفرح... ما لأتلهاش مطرح"

****

تحديث - 2:34


و اخيرا وصلني خبر بأن سايتهم تبطل...

دشيت.. و شنو لقيت؟




و مرّة ثانية... جت الحزينة تفرح... ما لأتلهاش مطرح

حوش استعداد ياللي ما تتسماش...

هناك 41 تعليقًا:

BoHSaiN يقول...

الموظفين ما يدرون عن شي :S
يمكن لأن توهم بالبداية ..
انت وايد مستعيل :P

sinfuleye يقول...

لوووول
نفس حالتي بالضبط بالضبط
بس انا رحت الكشك و لقيته فااااضي
بس ما قالو لي روح الموقع و لا شي
بس قالو تبي خط .. روح الكشك .. و انا رايح واحد بغا يدش فيني ..انا ماشي سيده و اهوا طالع من فرعي .. و على سنته الحبيب .. و يوم شافني كع بريك محترم خخخ
viva ....

ابو لطيف يقول...

هذي حركات دعاية

يبون ( يحرمصون ) الناس ... على قولة الحريم

غير معرف يقول...

بالواسطة حصلت على رقم ماسي


الرقم : 5555 5555

why me يقول...

انا اعرف وحده تشتغل هناك وحاجزه لي رقم ذهبي


حرره

;ppp

JiBLa CiTY يقول...

انا اقول ناخذ اكياس نوم (SLeep Bags)
ونبسط نفس شغل الميانين الللي ينطرون كتاب هاري بوتر كل مرة

:)


لو يسوون امكانية ان كل واحد يقدر يحصل على نفس رقمه اللي بالوطنية او الاتصالات جان زين

بدون اول رقم بالسبعة القديمة

اتمنى هالشي
مثلا
597797XX

سيفوه يقول...

سرحان

الله بالخير، حالها حال الوطنية لما اطلعت، بس تصدق ان زين ميتين خوف منها؟ حتى عندهم فريق كامل وخطط حربية

عاد مابي افضحهم بس أنا اقول أن فيفا راح تكون الأفضل وحسافة على شركاتنا اللي وحده صارت قطرية والثانية خرافية

Enter-Q8 يقول...

انت بالكويت و الشركة طاقمها كويتي
لازم شغل
معارف فلان و علان
يعني للحين داخل القوقعه الكويتية
المفروض قبل ما يعلنون على الارقام و الحجز
يتكلمون عن اسعارهم و خدماتهم

سرحان يقول...

bohsain

إي عيل ليش ينشرون هالمسج! تنرفزت و الله

سرحان يقول...

sunfuleye

دير بالك يامعوّد

سرحان يقول...

ابو لطيف

إي قلنا TEASER
بس مو على الطل

سرحان يقول...

غير معرف

للبيع؟ اعلى سعر :d

سرحان يقول...

why me

إي يبه.. شغل واسطات!

سرحان يقول...

jibla city

اتوقع هالشغلة تم الإتفاق عليها ما بين الشركات الثلاث.. تغيير الشركة مع الحفاظ على الرقم

سرحان يقول...

سيفوه

و الثالثة سعودية

سرحان يقول...

enter Q8

كلامك صحيح من وجهة نظر تسويقية
لكن الواسطة و المعارف تطغى على كل شي

nEo يقول...

معلش

تعيش و تاكل غيرها

ماكو على الوطنية للاتصالات :)

غير معرف يقول...

ههههه عجيييب
اي وين تفاصيل خدماتهم و اسعارهم
أو يمكن يبون أول يحصلون عملاء قدر الإمكان عشان بعدين يبلشونهم بأسعار و اشتراكات تكسرالظهر"مرّه"

thanks but no thanks

سرحان يقول...

nEo

محّد وطنية.. جربت الـ customer service مالهم ؟ شوية و يطقون العميل

سرحان يقول...

غير معرف

LOL!

Sn3a يقول...

حتى انا كنت بحجز
موقعهم ماتبطل

سرحان يقول...

Sn3a

سايتهم طايح حاليا... توه واحد عطاني هالمعلومة... خوش استعداد!

Yang يقول...

ما اخس من المربوط إلا المفتلت.

شركاتنا كلها طايح حظها....

شوفوا شركات السعودية قطر مصر ... الخ

وشوفوا الخدمات ...


تسلم اخوي سرحان على الموضوع, صراحة لو مو قاريه جان الحين أنا بالمريناو لوووول.

ملاحظة: عطنا خبر متى ينزلون الخطوط خل نروح :)

الـبـيـرق يقول...

و الله يـبـيـلـه رقـم يـاخـي ...

تـشـتـري رقـمـيـن زقـرت .. واحـد تـسـتـعـمـلـه و الـثـانـي تـخـلـيـه لـمـن يـزيـد سـعـره :d

xx7aiatixx يقول...

على فكره السايت يشتغل ساعه و يرد يعلق ساعه

كاني توني حصلت رقم حقي و حق اختي :)

why me يقول...

حت الكوت بالصدفه لقيت شنوووو زحمه على الكشك



ليش!!

شدعوه!


اهم شي الموظفين يدخنون


:/

حياتي هدف مو عبث يقول...

السايت شغال :)

Yin يقول...

لا تحزن يعني متوقع خدمات غير اللي بالساحة حاليا؟؟


قاعدة ذهبية:
"خلك على مينونك لا إييك اللي أين منه"

:))))

سرحان يقول...

yang

الطيور طارت بأرزاقها

سرحان يقول...

البيرق

تستعمله حق شنو يالنزغة؟ :d
و الثاني بيعه علي :)

سرحان يقول...

xx7aiatixx

دنيا حظوظ.. شنصت معاج و الله

سرحان يقول...

why me

خوووووش IMAGE حق الشركة! يدخنون بالكشك مالهم؟؟؟

سرحان يقول...

حياتي هدف مو عبث

عقب ما خلصت الأرقام الذهبية و الفضية!

سرحان يقول...

yin

إي و الله... و الحق ينقال، ما شفت على خدمة العملاء عند زين، صج ممتازة، و هذا اللي يخليني اتمسك فيهم

عتيج الصوف يقول...

بصراحة إللي ماله أول ماله تالي

شركة زين و بس !

سالفة الأرقام المتميزة طلعت خربوطة مجرد دعايه

الناس تبحث عن خدمات و أسعار و عروض

مو على أرقام...

منو هالأيام يحفظ أرقام ؟

سرحان يقول...

عتيج الصوف

يعني مسوين حركة.. و جان زين مشت!

why me يقول...

ي واحد بالكشك واحد يحوس ويرد الكشك بيدة زقارته


!!

سرحان يقول...

why me

لا بالله خوش سمعة

الكويت تستاهل يقول...

ألـــف شـــكر أخي الكريم والى أنرى كل جديد

سرحان يقول...

الكويت تستاهل

العفو أبوي، و شكرا على مرورك الكريم

الـبـيـرق يقول...

الأولانـي حـق الـفـرارة بـجـمـعـيـة الـمـنـصـوريـة كـل خـمـيـس و يـمـعـة الـسـاعـة 7 بـلـيـل "تـدري خـو نـظـام أول .. جـمـعـيـات و أقـطـع" :p

بـجـم تـشـتـري الـثـانـي ؟! :)


يـا عـمـي خـل يـشـتـغـل اللـنـك بـالأول :(