الاثنين، ١٦ فبراير ٢٠٠٩

قمع

.
.
راحت عليكم يالقزيزة... هايف يبيكم الحين :)
.
المسج من بوراشد و برلماني:
هايف يقترح قانون لقمع المعاكسات بالأماكن العامة بمعاقبة المعاكس بالحبس مدة لا تتجاوز 6 شهور و غرامة لا تتجاوز 1000 أو بإحدى هاتين العقوبتين.
.
قمع مرة وحدة؟ انت من وين تييب مصطلحاتك و افكارك؟ على فكرة... المعاكسات أمر قبيح و كلنا ضده، و إذا وقفت المعاكسات نفسيا راح نرتاح، و اساساً راح تقل الزحمة و تقل الحوادث... أما أنا فعندي لك إقتراحات بسيطة و أتمنى إنها تحصل.."قمعك" راح ينوخذ بطريقة الواسطة و "ولد عمي" و "ولد قبيلتي" لأن فيه سجن و فلوس بس... و ماله داعي أقولك منو أكثر ناس يتحرشون بالمجمعات عشان لا اجرح شعور أحد!
.
حلولي:
  1. تصيد الولد و تقرعه (تحسونة تواليت على كيف اللي يصيده و يصوره)
  2. و تقطه في باص الداخلية و تسحب ليسنه 3 شهور (أو) بالنظارة 3 أيام.. أو بكلتاهما!
  3. تنحط صورته في موقع وزارة الداخلية (افتح لك صفحة داخلية إسمها الزاوية السوداء)
  4. تتسجل السالفة في ملفه!
  5. و يتسجل عليه تعهد عدم الرجوع للمعاكسة لمدة 5 سنوات عشان بس تنشال من ملفه هالفضيحة.
.
.
شرايكم فيني؟ ما أنفع (مُشَرِّعٌ) ؟
.
أما على صورة المحقان اللي فوق... لحّد يسالني ليش ذكرته لما قريت المسجات...

****

بيت القرين عندها "ما أهيفك"

هناك ٢٦ تعليقًا:

سبمبوت يقول...

أحلى مشرع بالعالم .. الله يخليك لنا انشاء الله ..
والأحسن من هذا وذاك تطبع على يبهته كلمة ( قليل أدب ) ما تروح إلا بعد اسبوع. فبالتالي ما يطلع من بيتهم من الفشلة .. وبهذا يكون Grownded غصبا عليه :)

فريج سعود يقول...

عيل خل اقول لك الي قلته عند بيت القرين

خل يسكرون المجمعات وشارع الحب والخليج

ويعممون الكامريات ويمنعون البورشات والفراريات وغيرهم

بعدين القانون ما اغفل المعاكسات

Mohammad Al-Yousifi يقول...

مع هايف قلبا و قالبا

مَـــــعْــــمَــــعَـــــه يقول...

والله اهو اللي يبيله قُمْع واعتقد راح تقمعه المحكمه بسبب الانتخابات الفرعيه لان كل الادله واضحه ومتوفره من صور وواحد من الصناديق وبشهادة المباحث

واعتقد الحكومة راح تردله الصاع صاعين بعد تقديمه استجواب رئيس الوزراء

قانونى كويتي يقول...

يعطيك العافية اخونا العزيز سرحان

بالنسبة للمقترح

يعنى على فرض اذا طبق وكانت العقوبة 1000 دينار بالتالى ولى الامر المغلوب على امره اهو اللى راح يدفع المبلغ ويعنى ان المعاكس ماراح يتعض

وهم اذا انسجن الولد يمكن مستقبله راح يتدمر والسبب انه قد يكون اول مرة تحرش وابتلش طول عمره

اسمحلى اخوى العزيز انا يمكن عندى اقتراح يمكن انت توافقنى عليه


بدال ما انحط عقوبات على الشباب

ليش ما نرفع قروض الزواج الى 20000 الف دينار بدال من 4000 دينار

صدقونى ماراح انشوف اعزوبى بالشارع بعد

وكل الشباب من عمرهم 18 سنة راح يتزوجون


واتمنى اخوى سرحان اتوصل اقتراحى للاخوة الاعضاء


واسف على الاطالة

تحياتى

@alhaidar يقول...

والله اقتراحاتك أفيد سرحان أفندي ..

بس الأخ محمد هايف لازم يقول جذي ..

شتبي جماعته يقولون مو حريص على الشرع والعياذ بالله ؟


انا اقترح أيضا يعاقب من لا يحترم وطنه ولا يقف للنشيد الوطني بل يعتبره بدعة ..

فهو اشد خطرا من الغازلجية ;)

تقبل تحياتي :)

enter-q8 يقول...

معليش سرحان تبي الصج
المفروض اغلظ و اغلظ بعد
اللي قاعد يصير مسخره
مو عارفين نطلع مع اهالينا
ترى صايرة بزود
اسال المجمعات التجارية عن الحالات اللي قاعده تصير ارقام رهيبة

الدســتور يقول...

خوش اقتراح

ساره النومس يقول...

يا انت يا حركات صكيت عليه والله :p

ساره النومس يقول...

اي صح جذي والشباب يخربطون برا الدين بيحطون هالقانون الشباب بيصيرون مثل الديرة الفلانية الي شبابها عسى مايروحون برا فقر كل شي يسوونه لووول

joe يقول...

اذا هايف سوا الي براسه
المجمعات راح يخف الدوس عليها و يصير ازمه ماليه عند محلات الملابس والمكياج

اقوول حق هايف امسك مينونك لا اييك الي اين منه

سرحان يقول...

سبمبوت

حبيت سالفة الطبعة

سرحان يقول...

فريج سعود

مقترح جميل !

سرحان يقول...

مطقوق

أحييك!

سرحان يقول...

معمعه

أتمنى و الله!

سرحان يقول...

قانوني كويتي

قسما بالله إن اقتراحك قوي!
و راح يصير الوضع مراكض على الزواج

بس خوفك من الملتفين على القانون

سرحان يقول...

أحمد الحيدر

حاضرين :)

سرحان يقول...

Enter-Q8

و الله أدري... صاج
الوضع قبيح جدا جدا جدا.. و شوف عيني محد قاللي.
لازم تكون في عقوبات، لكن مو بطريقة يمكن للواسطة أن تدخل فيها

سرحان يقول...

abu aldestoor

و الله لو كانت العقوبة مباشرة بسحب الليسن و الحبس و التقرع و نقطة سوداء في الملف.. تكون ولا أروع!

سرحان يقول...

طموحة مملوحة

الموضوع موضوع تربية بالأخير... أتوقع اقتراح الأخ قانوني كويتي قوي و الله و يضبطهم

سرحان يقول...

المباركية

إذا خف الدوس على محلات المكياج تبين الويوه الصجية و ينكشف المستور

ANGEL HEART يقول...

هههههه واايد عجبني اقتراح سبمبوت الطبعه..

والله مادري نضحك نبجي على هالاقتراحات

انزين والبنت شنو عقوبتها؟؟

ZooZ "3grbgr" يقول...

أذكر وانا بالمتوسطه كنت اتمشى بالواجهة واهلي قاعدين عالبحر طبعاً الحجي قبل الغزو .. تحرشوا فيني اثنين .. واحد منهم قام يقولي يا قشطة يا جبنة كيري .. عاد مغازل أول ههههههه .. ما يشوووف الا وراه ذاك الشرطي ويسحبه من أفاه .. وإيي الشرطي الثاني معاي يبي اهلي انا حدي تصروعت شسوييييت .. قامت معاه خالتي .. ولا يقول بغيناكم تعرفون راح نقرعه الحييييين .. عاد الولد كان بوقذيلة .. القذلة تسحب على كتر .. قام يبجي يقول أتوب أتوب ههههههه حرام خالتي سامحته ...


إيييييييه راحت ذيج الايام

الحين اللي يغازل لسانه يلوط أذانه

آنا مع التقرع بنفس اللحظه

بس اذا أقرع مشكله!!

why me يقول...

خوش حلول

عثماني يقول...

خووووووووووووووش تشريع يا خوي

والحبيب شكلة يحب القمع

عطوه قمع

:)

المتهـافت يقول...

يعني عادي عادي جدا باجر واحد يمشي بالشارع اتيي وحده ماتشتهيك او بينك وبينها عداوة او خلافات اسرية او حتى ماعطيتها ويه اتقول هذا تحرش فيني وتاكلها 6 شهور بدون ذنب

هايف لا بغيت تحل مشلكة لا تخلق لنا مشكلة ثانية ياهايف

شكرا سرحان