الأربعاء، 23 يوليو 2008

WALL OF SHAME

منو ترشحون للـ WALL OF SHAME ؟؟
يرجى تسمية أكثر الشخصيات اللي لها التأثير السلبي على الكويت
من ناحية عرقلة التنمية، تصدر قوائم الفساد، السرقات، التعديات، خرق القوانين... إلخ!
المطلوب من كل واحد/وحدة هو
3 أسماء فقط

هناك 17 تعليقًا:

Bo Jaij يقول...

حلومة - سمير القلاف (مرعوب) - بشار عبدالله (المعتزل دوليا)

سرحان يقول...

بو جيج ...

حبيبي، قلنا اقتصاديا و سياسيا...
مو المتخلفين عقليا... :|

غير معرف يقول...

سؤال بسيط: اختار اي ثلاثة من مجلس الخـ...ــة

فتى الجبل يقول...

بس 3 اسامي
حده وحيل شوية

Blog 3amty يقول...

علي الخليفة العذبي الصباح

محمد ضيف الله شرار

أنا !

Blog 3amty يقول...

لا لا لا موو أنا .. عمتي !

:@

Shurouq يقول...

عوير
زوير
والمنكسر اللي ما فيه خير

تحديد ثلاثة أسامي فقط صعب وقد يكون فيه ظلم.. خاصة وأن كبار المفسدين يجيدون الاختباء وراء "صغار المفسدين"، إن صحت التسمية

محمد ضيف الله شرار يستحق اللقب بتجاوزاته اللي أشار لها ديوان المحاسبة

وأحمد الفهد بتدخلاته المستمرة في الانتخابات وفي توجيه النواب

والاسم الثالث مفتوح لعدد كبير من النواب السابقين والحاليين ممن تمرسوا في التجاوزات، من التوسط لمتهمين، إلى تحصل على أراضي مميزة بغير وجه حق، إلى تكسبات غير مشروعة، إلي إرهاق ميزانية الدولة بشتى الطرق

Bo Jaij يقول...

هذى أسماء مستعارة و أترك للقراء فرصة (تركيب) الأسماء على شخصيات سياسية معروفة

سرحان يقول...

غير معرف:
أضيع جذي ياخوي..

فتى الجبل:
اللي يخطرون اببالك...

بلوق عمتي:
اتفق معاك بإسمين.. :)

شروق:
أتوقع ذكر أسماء المفسدين ماهو ظلم، و الفاسد يبقى فاسد، كبير ولا صغير... و الأسامي اللي قلتيها "رموز للفساد".. كمليهم بالثالث :)

بو جيج:
جاري البحث عنهم طال عمرك :)

Shurouq يقول...

سرحان
الظلم مو في ذكر أسماء ثلاثة مفسدين، الظلم ف الإغفال عن ذكر بقية المفسدين :)

ثالثهم علي الخليفة.. يمكن ما ذكرته لأني استوعبت إن الثلاثة من الأسرة الحاكمة.. أو مناسبينها، فحبيت أنوّع.. لأن الفساد لا ينحصر في الأسرة

العرزالــــــه يقول...

سرحان

هو اسم واحد

لكني ما اقدر اقوله

:)

kila ma6goog يقول...

بو جيج

بو جيج

بو جيج

غير معرف يقول...

1- علي الخليفه
2- احمد الفهد
3 - (الخرافي)

غير معرف يقول...

اللي امخربين الوضع بالكويت :

أولا : اللي داشين مجلس الأمه تحت عباية الاسلام : الصراحة سخيفييين و مو مقتنعين بالكلام اللي ايقولونه بس ايحاولون ايبيعونا حجي امصفصف يوحي بالفضيلة ، أهم شي انه الطبطبائي و اللي اهو محسوب على الاسلاميين و يا كثر ما ينقد العالم و يعظ و آخرتهاقرينا خبر ايقول انه أنقذوه من الغرق في احد الشواطئ "الأوربية " ها ؟ شموديك اهناك حجي ؟ اشهالتناقظ ؟ أشكره يستشرف و يلمع صورته.. يستغل الدين و يطول اللحيه لأن من غير اللحيه اهوه ولا شي .. اللحيه تفرض على اللي جدامه احترام و صج تمشي على الناس .. الدين سلوك مو شكل .. اشفايدة اللحية و أنا على " احدى شواطئ آوربا " ؟ خلت الدنيا من " الشواطئ" ؟ ما حلا لك السبوح إلا على شواطئ "الأوربية" ؟ اللي مو معترفين ابشي عاد اهناك كل شي ماشي .. أوكي طاف انزين لمن كانو بكرمون الكويت في احدى المحافل بره على أساس عطينا المرأة الكويتيه حقها أول منو قام و الناس اتصفقله اهوه .. انزين عن الفشلة جان قعدت و تمسكت ابمداك ! وأنا طبيت فيه لأن أدري سوالفه بس ترى غيره مو أحسن منه ،، الوضع ان اللي امخرب علينا ان ما انفكر .. ما عندنا ثقه ابتفكيرنا نحتاج احد يرشدنا و يقولنا بابا هذا خطأ ماما هذا صح .. و أكو ناس تستغل هالشي اتقول هايله اليوم قايم سوق الدينيين؟ يعني اذا صرت دين أصير قوي ؟ يله قصر الدشداشة و ربي اللحية هذا ظمنت على الأقل نص الناس اللي في الكويت ،، ثمن ارخيص الصراحة و سهل وايد بعد بس بحوس وراهم ترى ماكو شي ، رصه بالأسئلة كل أجوبته تلقين و جامدة و لازم ايسويلك ارهاب فكري لأن ما يقدر ايفكر ابروحه .
ثانيا : المنافقين اللي عندهم مليون ويه و ما اتصيد عليه شي و علاقته زينه مع الكل و خصوصا اللي عندهم قوة اليوم و بما ان الدينين لهم الأغلبية اليوم اتلاقيهم تمام وياهم و من مصلحته الوضع ايظل جذي و يشتغل من تحت لي تحت عشان الدينيين يتحملون كل النقد و اهمه بالظل احساباتهم اتزيد على البراد .. الصراحة هذيل اللي لاعبينها صصححح ، هدفه انه ما يكون لا ابيض و لا أسود و يظيع كل طاقته يرظي الناس بدال ما ايسوي الشي اللي صج مقتنع فيه و منو اللي يدفع الثمن ؟ الشعب لأن ما تقدر ترظي كل الناس فاتحاول انك تتحاشى النقد بس ، ما اتعمر و لا اتبدي أي محاولة تعتقد انها لمصلحة الكويت خوفا من ان احد ينتقدك .. نقدر انسميهم (منافقين - جبناء ) .

و أخيرا أكو الناس الساكته "الخرفان " اللي ما اتكلف على عمرها اتشغل الجهاز العصبي اللي الله عطاها اياها .. آكل ، أشرب ، أنام أنا تمام !! مهمتهم اتسهل على النوع الأول و الثاني ! all in all wall in shame = واحد داش مجلس الأمه تحت عباية الدين ، واحد حاط مصلحته الشخصية جدامه و مو هامه شي "منافق كلكجي و أكبر جبان ما ايواجه لان يعتبر أن لمن يكشف عن مبادئة غباء لأن الناس راح اتحاسبه على حسب اللي يقوله ، و الثالث للأسف : المواطن الكويتي العادي و هالموضوع يبيله تعليق يديد !!

سرحان يقول...

غير معرّف... كلامك روعة!

كمل تعليقك عن المواطن الكويتي رجاءا

غير معرف يقول...

محمد ضيف الله شرار

علي الخليفة العذبي

اي نائب سواء كان سابق او حالي طب و تخير عندك سعدون حماد عصام الدبوس جمال العمر فهد الخنة

غير معرف يقول...

إيييه المواطن الكويتي مشكلة ،، باختصار أغلب الناس اللي حوالينك نسخ من بعض ، تبي اللي واحد غير .. واحد جريئ و ايقول لا أنا --> أنا .. مهما قالو عني و مهما كسرو مجاديفي هذا موقفي هذا منطقي لأن كيت و كيت و كيت ، يبني لك منطق ، اتحس فيه روح ، لأن أكو ناس تسبح عكس التيار من غير هدف همن، هذي الناس خالف تعرف سخيفة بس تبي اتثير الانتباه ، أنا أتكلم عن اللي لمن ايقولك " أنا مع ولا ضد الراي الفلاني " لمن ايقولك ليش ايشدك ابقوة البناء المنطقي للفكرة اللي ايقدمها .. هالفئة نادرة بالكويت .. ليش قيسها على أقل مستوى ، قيسها على مستوى اللبس ، عسى ما طبت الديرة موضه ايديده اتلاقي ماكو أحد بالكويت مو ماشي عليها ، الأساور مالوت دعم السرطان الناس قامت تلبس من غير ما تدري ليش ايها لابسه هالشي ،، والله شي يظحك و تدري شنو اللي أدهى و أكبر من هذا ؟ أن هالفئة " الخرفان " عندها قوة اتخلي أي أحد يبي يتمرد و يكون مو خروف ---> تقضي عليه !! عيل ها ؟! تبي اتكون غير ؟ تبي اتقول أفكار ايديده ؟ أول شي بنسويلك عزل اجتماعي و بنقول عنك معقد و ابنظغطك لمن تتسنع و تصير مثلنا؟ ما نفع فيك ؟ أوكي ابنركب على ظهرك راح انخليك تظهر ابصورة الfreeek و تالي راح انسوي روحنا الأبطال و احنا نوقف ابويهك ،اهني عاد أقوى انسان و صاحب أكبر عزيمة و ارادة راح ايفج اهني لأن كل ما حاول أكثر ، كل ما ارتفع شان خصمه .. قوة الكم ترتفع على احساب قوة الكيف ، حتى لو كانوا خرفان فا اهمه أقوى منك رظيت ولا انرظيت ، فا انت يا أما تستغل الخرفان مثل ما سواو الأخوان اللي يدعون الدين ، و لا اتقص عليهم ابشكل امرتب " اتقولهم اصلاح اصلاح اصلاح " مو إلا اتوريهم خطط الاصلاح لأن راح ايملون ، كافي اتصارخ اتقول اصلاح لأن هذي الكلمة الرنانة اللي راح يحفظونها العامة لأن اتخلي اللي ايقولها جنه فاهم بس اهو بالصج الله يستر عليه ، أكو ناس تتعمد اتقول كلمات مثل بيوقراطية و بطركية و هالسوالف و اهي ماتدري شنو يعني ! لو تدري جان والله استانست لأن شي زين انواكب المفردات اليديدة و نحرك لغتنا الراكدة بس لا اشلون نقرى كتاب ؟ منو ايشوف مسلسل نور عيل ؟ منو ايجابل الفيس بوك ؟ لا يا امعود أقرى كتاب اشتبي ايقولون عني بو قلبين ؟ العموم كلية تجارة و شرطة و بعدين موظف طايح حظه "بطاله مقنعة " و هوايته جان زين رياضة معينه ولا فن معين يبدع فيه، لا والله هوايتي أدق حديد علشان البودي يطلع أوكي علي ، لا و جان زين طبيعي ،، أبر المشكلة !و اذا بنت هوايتي أنا shopping !! أقول على فكرة ترى هذي مو هواية هذي تفلسف باريس هلتون! يعني بالضبط درجة استفادة الكويت من هالأشكال صفر لا و بالناقص بعد لأن اتخرب على غيرها بعد ! اشلووووونننن اتصيييررر أحسسنن منيي ؟؟ اشلووونن توقف و اتقول عني ما أفهم ؟ أتقبل كلامك ابصر رحب و أتقبل انتقادك ؟ مستحيل ! كرامتي ! يا امعود منو قرب من كرامتك ؟ هذي وجهات نظر ، حوار حضاري أنتقدك و تنتقدني و أحاجج و اتحاججني .. ايقولك ما يحتاي أنتقدك أنا راح أحرقك أنا و ربعي ! هيهيهي اتفضل عاد انت شترد ؟ شتقول ؟ (( ما جادلتو عالما إلا و غلبته ، و ما جادلتو جاهلا إلا و غلبني )) بس طاف حط الهيد سيت و ارفع الدريشة ، أغنية freeek امدحولي اياها ، حطها أحسلك من امناطح الطوفة أنا أقول ...

shosh