10 × 10 (الجزء الثاني)

إعلاميا:

1. ليش زايدة هاليومين المجلات الشبابية؟
2. ليش كل من كتبله مقال صار عباله إنه وصل مواصيل المرحوم د.أحمد الربعي؟
3. ليش زادوا عندنا كتّاب الروايات التافهة من الشباب؟ ناقصين تفاهات؟
4. ليش كل من كتب له روايه قام يتمشى و هو ماسك روايته و يقعد يقراها؟ بديت أشك إنك كاتبها!
5. ليش الكل مستانس على مايك مبلتع؟
6. ليش أكو مذيعة سكرانة تسب و عالهوا بإذاعة الكويت؟
7. ليش نواف القطان شعره جذي؟
8. ليش سالي القاضي مليقة؟
9. ليش فؤاد الهاشم ما يستحي على ويهه؟
10. ليش أكو دكتور جامعي يكتب بالوطن عن الأخلاق و الفضيلة و هو عليه قضايا إعتداء جنسي بالمحاكم؟

شوارعيا:

1. ليش الهنود لي ساقوا عبالهم شارع أبوهم و يا ويل اللي يصير يمهم أو جدامهم؟
2. ليش أخواننا المصريين (مو كلهم... أغلبهم) لي ساقوا يحبون يتقلقصون بين السيارات و بالذات بالزحمة؟
3. ليش الحريم (مو كلهم.. أغلبهم) لي ساقوا ما يلتزمون بحارة وحدة و يمشون فوق الخط الفاصل بين حارتين؟ وناسة؟
4. ليش وايد حريم يشبون الليت العالي الصبح؟
5. ليش أصحاب مكاتب التكاسي الجوالة اكثرهم ضباط بالمرور؟
6. ليش أكو وايد عمال يخطرون الشارع مع إنهم واقفين يم جسر المشاة؟
7. ليش أكو يهال يبيعون عطور تييب الحساسية عند الإشارات؟
8. ليش الناس لي شافوا دورية بالشارع خففوا يمها و طالعوها؟
9. ليش الناس إذا صادتهم كاميرا بالشارع يطقون بريك؟
10. شنو سر سيارات الكولت اللي مركبة ليتات زينون؟

انترنتياً:

1. ليش أكو وايد منتديات من نوع "دمعة حزن"... "مكسور الجناح"... "شبكة معمع"... "منتديات فخفخ"؟؟
2. ليش المواقع الكويتية و بالذات الحكومية ممكن اختراقها بسرعة؟
3. ليش عندنا معترفين بس بشركتين انترنت و الثالثة محد يدري عنها؟
4. ليش هايف يبي يحجب يوتيوب؟
5. ليش المواصلات يبون يراقبون و يحجبون بعض المدونات؟ (معصي!!)
6. ليش وزارة الإعلام مراقبين مدونات وايد و منها مدونتي الفقيرة؟
7. ليش د. فيصل المسلم فاتح بورفايل في فيسبوك؟
8. ليش ما يصير عندنا انترنت نفس اليابان؟ 1 GBPS ؟؟
9. لي متى كله إيميلات "أستحلفك بالله ان ترسله لعشرين شخصا و لك الأجر" ؟
10. تدرون إن أكو واحد محرّم استخدام لفظ "برب – BRB" و يقول إنه دسيسة غربية متربصة بالجيل الإسلامي و فيه إهانه للفظ الجلالة؟

طلابيا:

1- ليش الإئتلافية قياداتها محصورة على الأخوان؟
2- ليش المستقلة انحرفت عن مسارها اللي بدأ في أواسط التسعينات و صارت قائمة قبلية متأسلمة؟
3- ليس الوسط الديمقراطي ما يفوز على الرغم من رقي طرحه؟
4- ليش السلف و الأخوان متحالفين في الجامعة؟
5- ليش الإئتلافية يقولون إحنا مو أخوان جدام الطلبة؟ و لما نصير وياهم بروحنا يتكلمون عن حدس و يتفلسفون؟
6- ليش المستقلة مستانسين الانتخابات اللي طافت على رقمهم؟ مع إنه نسبتهم طايحة 3% ؟؟
7- ليش القائمة الإسلامية صارت بالمركز الرابع؟ سياسة الإختراق ما فادتكم هالمرّة؟
8- ليش السلف دايما ياخذون لجنة التثقيف و التوعية الإجتماعية بالإتحاد؟
9- تدرون إن اللي يقول عن المستقلة قائمة وطنية (حاليا) فهو غلطان؟
10- تدرون إن الإئتلافية قاعدة تفكر جدياً في إحتواء المستقلة قاعديا بعدما احتوتها فكرياً؟

شخصيا:

1- ليش عندي مدونة؟
2- ليش قاعد أحر نفسي و أكتب مواضيع فيها؟
3- ليش أنا ما أطلع من البيت إلا قليل؟
4- ليش قاعد أكتب هالبوست بالدوام؟
5- ليش تلفوني يعلّق؟
6- ليش ماني قادر انام عدل؟
7- ليش راسي يعورني؟
8- ليش zooz و Fashionista يحنّون يبون الجزء الثاني من هالموضوع؟
9- ليش دوامي 8 ساعات؟
10- تدرون إنه هالبوست هذا رقمه 100؟؟ و اللي يساوي 10 × 10؟؟

تحياتي